Գիշատիչ գազան հիշեցնող, համարձակ ու ինքնավստահ «հայացքով» նոր Galibier 16C Concept սուպերսեդանը, շարունակելով Bugatti-ի ընտանեկան ավանդույթները, պահպանում է այդ ընտանիքին բնորոշ «ամենա-ամենա» տիտղոսը: Bugatti ապրանքանիշն առ այսօր պահպանում է իր հիմնադիր Էտորե Բուգատիի կարևորած սկզբունքներն ու արժեքները` նրբաճաշակ արտաքին, հզոր տեխնիկական բազա, բացառիկություն...
Տարիների ընթացքում ձևավորված այդ գովելի ավանդույթը չի խախտվում նաև մոդելների մերօրյա «սերնդափոխության» ժամանակ: Bugatti-ի վերջին գլուխգործոց Bugatti Galibier 16C ներկայացուցչական մոդելի կոնցեպտը իր դասում ամենաարագ, ամենաթեթև, ամենաէքսկլյուզիվ, ամենաէլեգանտ ու ամենաթանկարժեք սեդաններից մեկն է:
Պարզվեց նաև, որ այն բավական ինտրիգանտ է: Չնայած, որ Bugatti-ի նորեկին սպասում էր ամբողջ ավտոաշխարհը, ֆրանսիացի «փոքրիկի» գերմանացի կնքահայր Volkswagen ընկերությունը որոշեց, որ «հրաշամանուկի» ներկայացումը կլինի ոչ թե հեղինակավոր ավտոսրահում` Ֆրանկֆուրտում` ի տես բոլորի, այլ Բուգատի ընտանիքին պատկանող Molsheim-ի առանձնատանը` հատուկ ընկերության հաճախորդների համար կազմակերպված մասնավոր երեկույթի ժամանակ: Այդ խորամանկ ու մարտավարական քայլն էլ ավելի բորբոքեց մրցակիցների ու երկրպագուների հետաքրքրությունը: Դրա շնորհիվ էլ Bugatti Galibier 16C-ն, չնայած ֆրանկֆուրտյան ավտոսրահում ստացած բացակային, ուշադրության ու հետաքրքրասեր հայացքների պակաս չունեցավ:
Ավտոսիրահարները հետաքրքրությամբ ու ագահությամբ դեռ շարունակում են այդքան ժլատորեն տրամադրվող տեղեկատվությունից տվյալներ հավաքել մեքենայի տեխնիկական հնարավորությունների մասին: Բայց եղածն էլ բավարար է, որպեսզի բոլորը միակարծիք նշեն Bugatti Galibier-ի կատարելության փաստը: Այս մեքենայում ներդաշնակ ձևով համադրված են ժառանգական սպորտային խառնվածքը, լյուքս մեքենաներին հատուկ շքեղությունն ու հարմարավետությունը:
Bugatti Galibier-ի ագրեսիվ «հայացքը», կարծես, մարտահրավերի կոչ է բոլոր մրցակիցներին: Այն միևնույն ժամանակ չարախինդ է ու վստահ, որ ինքն անհաղթելի է: Բնականաբար մեքենայի այդ ինքնավստահությունն անհիմն չէ: Նրա երկկողմանի բացվող կապոտի տակ իր նախորդներից «ժառանգություն» ստացած 8 լիտր աշխատանքային ծավալով, մինչև 800 ձիաուժ հզորություն զարգացնելու հնարավորությամբ W16 շարժիչն է: Դա էլ այն դեպքում, երբ մեքենան բավական թեթև է կշռում (ոչ պաշտոնական տվյալներով մոտ 1900 կգ) այդքան մեծ շարժիչի համեմատ: Այդ հզորության ամբողջ «բեռը» հավասարապես բաժանվում է չորս անիվին` շնորհիվ լիաքարշակ համակարգի:
Սակայն, ի տարբերություն իր «դոնոր» Bugatti Veyron Grand Sport-ի, որի ուժային ագրեգատն օգտագործում է չորս տուրբոներմղիչ, ինչն էլ հնարավորություն է տալիս զարգացնել 1001 ձիաուժ հզորություն և մինչև 407 կմ/ժ արագություն, Galibier 16C-ն բավարարվում է միայն երկուսով` առավելագույն արագությունը հասցնելով 350 կմ/ժ-ի: Այդ հանգամանքի շնորհիվ Bugatti Galibier 16C-ն կարող է դառնալ ամենաարագընթաց 4-դռնանի սեդաններից մեկը, եթե իհարկե դուրս գա սերիական արտադրության: Այդ գերհզոր շարժիչը համագործում է 8-աստիճան ավտոմատ փոխանցումատուփի հետ: Մեքենայի «իրանը» ձեռքի աշխատանք է, որ պատրաստված է գերժամանակակից նյութերից` կարբոնից ու ալյումինից: Առջևի թևերն ու դռները պատրաստված են ալյումինից, իսկ «իրանի» մյուս մասերի համար օգտագործվել է մուգ կապույտով ներկված կարբոն: Մեքենայի արգելակները ևս պատրաստված են ամուր կարբոն-կերամիկական նյութից:
Ինչպես ասացինք, նոր մոդելն ընտանեկան լավագույն ավանդույթների ու հատկանիշների արժանի ժառանգորդն է: Նրանում պահպանվել են Bugatti-ի ֆիրմային ռադիատորային քողարկիչը, ինչպես նաև իր «նախապապերի» կառուցվածքում հաճախ կիրառվող ողնաշար հիշեցնող ելուստը, որ լայնությամբ երկու հավասար մասի է բաժանում հետևի ապակին: Ի դեպ, մեքենայի անվան Galibier մասնիկը Tour de France հեծանվաարշավի ամենադժվար հաղթահարելի ալպյան լեռնանցքներից մեկի պատվին է:
Նոր սեդանի ինտերիերում իշխում է մինիմալիզմը: Սարքավորումների վահանակի էլեմենտներն ընտրված են ամենաանհրաժեշտի սկզբունքով: Կենտրոնում տեղադրված են հիմնական չափող սարքերը` տախոմետրն ու սպիդոմետրը: Վերջինի դիրքը հնարավորություն է տալիս ոչ միայն վարորդին, այլև ուղևորներին հետևել մեքենայի արագության ցուցանիշին: Շքեղ սրահը պատրաստված է կաշվից ու բարձրորակ փայտից: Սրահը զարդարում է նաև Parmigiani շվեյցարական լյուքս ժամացույցներ արտադրող առաջավոր ֆիրմայի` հատուկ Bugatti Galibier-ի համար պատրաստված Reverso Tourbillon-ը, որը նախատեսված է նաև ձեռքին կրելու համար: Նոր սեդանի համար որպես վառելանյութ օգտագործվելու է ոչ միայն բենզինը, այլ նաև բիոէթանոլը:
Դե էլ ինչ՞ է հարկավոր նման մեքենա ունենալու ցանկությամբ վարակվելու համար: Թերևս ոչինչ: Բայց սա այն դեպքն է, երբ ցանկությունն ու հնարավորությունները տարբեր սանդղակներին են: Նախ այս «հրաշամանուկը» դեռևս կոնցեպտային տարբերակով է ցուցադրված: Եթե անգամ նրա տերերը որոշում ընդունեն դուրս բերել մեքենան սերիական արտադրության, դա կլինի ոչ շուտ քան 2013 թ.` Bugatti Veyron-ի սերիական արտադրության ավարտից մեկ տարի հետո: Երկրորդ. այն արտադրվելու է սահմանափակ քանակությամբ (նախնական տվյալներով 150 օրինակ): Եվ իհարկե ամենակարևորը` Bugatti Galibier-ի արժեքը հավանաբար կկազմի 1 500 000 եվրո, որը գերազանցում է մինչ այսօր ամենաթանկարժեք սերիական արտադրությամբ սեդան համարվող Maybach 62S Landaulet -ի 900 000 եվրոն:
Bugatti Galibier-ի թերացումների մասին խոսել չենք կարող մի պարզ պատճառով` մեքենան դեռևս հասու չէ և ոչ մեկին: Դրա մասին տրվող ամբողջ տեղեկատվության մենաշնորհը նրա հեղինակներինն է, որոնք, իհարկե, սիրող ծնողի օրինակով բարձրաձայնում են միայն իրենց «փոքրիկի» արժանիքների մասին:
Ու մինչ Bugatti-ում ծանրութեթև են անում մեքենան սերիական արտադրության դուրս բերելու բոլոր դեմ և կողմ փաստարկները, ավտոսիրողները շարունակում են կռահումներ ու վերլուծություններ անել խորհրդավոր կերպով ավտոաշխարհ մուտք գործած Bugatti Galibier-ի մասին:
PDF տարբերակը
Վերադառնալ 
Տպելու տարբերակը 
